Gjykata e Posaçme nuk ka pranuar kërkesën e ish-gjyqtares së Krujës, Enkelejda Hoxha, për një masë më të butë sigurie. Kërkesa e saj është rrëzuar për herë të tetë.
Me refuzimin e kërkesës, lihet në fuqi masa “arrest me burg”. Hoxha është arrestuar në muajin shkurt të këtij viti, nën akuzën për “korrupsion”.
Sa i takon kërkesës për masë më të butë, kjo është bërë me argumentin për shkak të gjëndjes shëndetësore të fëmijëve të ish-gjyqtares së arrestuar. Përveç djalit të saj për të cilin raportohet që ka probleme të shëndetit mendor, sipas akt ekspertizës, edhe vajza e saj e mitur ka shfaqur probleme psikologjike.
Ish-gjyqtarja Hoxha u arrestua nga SPAK pas një super-operacioni të zhvilluar në Gjykatën e Krujës, gjatë seancës gjyqësore, teksa po lironte një tjetër të dënuar.
Këshilli i Lartë Gjyqësor shkarkoi nga detyra Enkelejda Hoxhën më 17 mars, e akuzuar se ka shkelur detyrën në lirimin e disa të dënuarve me burgim të përjetshëm, vendim të cilin Hoxha e ka apeluar.
