Deklaratat e Sekretares për të Përndjekurit në PD, Jonila Godole, shkaktuan shumë bujë. Ajo kërkoi distancim nga ish-kryeministri Sali Berisha. Në telefonat e të gjithë deputetëve dhe anëtarëve të strukturave të PD, ka shkuar një mesazh nga kreu i grupit, Alfred Rrushaj, i cili duke marrë shkas nga qëndrimet e Godoles ka kërkuar që askush të mos flasë në media pa u konsultuar më parë.
“Mirëmbrëma të gjithëve! Duke ju uruar shumë suksese në detyrën e rëndësishme që ju është besuar, kërkoj mirëkuptimin tuaj për të mos konfirmuar asnjë dalje mediatike pa koordinuar më parë mesazhin politik për temat që diskutohen.
Gjithashtu çdo dalje mediatike për çështje politike duhet të realizohet me një njoftim paraprak të Zyrës së Shtypit të PD. Ju falenderoj për mirëkuptimin! Gjithë të mirat, Alfred Rushaj”, thuhet në mesazhin dërguar demokratëve.
Mesazhi i Rushajt dëshmon se Basha po i jep mundësinë Berishës të reflektojë dhe të marrë kohën e duhur. Nga ana tjetër duket sikur kemi një konsensus mes tij dhe Bashës për të shmangur çdo lloj ndarje brenda PD-së.
