LSI-ja mori 4 mandate nga zgjedhjet e 25 prillit. Pas zgjedhjeve, kryetarja e Lëvizjes Socialiste për Integrim, Monika Kryemadhi nuk është parë më, duke ngritur dyshimet se çfarë po ndodh me të. Ajo është zhdukur nga jeta publike dhe politike e vendit.
Dalja e saj e fundit në media ishte deklarata që ajo mbajti pas zgjedhjeve të 25 prillit, ku teksa pranoi humbjen e LSI-së, i kërkoi edhe falje presidentit Ilir Meta dhe u shpreh se djegia e mandateve ishte një strategji e gabuar. Kryemadhi ia faturoi humbjen një strategjie të gabuar të LSI-së, duke nisur nga djegia e mandateve e përfunduar në mospjesëmarrja në zgjedhjet lokale të 2019-ës. Ajo tha se shqetësimi i presidentit Ilir Meta ishte i drejtë.
Ndonëse në vend ka pasur zhvillime të shumta, kryetarja e LSI-së s’ka patur asnjë reagim në media dhe asnjë postim në rrjetet sociale.
(Postimi i fundit në rrjetet sociale)
Përpos heshtjes së Kryemadhit, edhe shumë ish-deputetë të kësaj force politike janë distancuar nga partia e presidentit Meta, që pas humbjes në zgjedhjet e 25 prillit.
I vetmi që ka qenë aktiv është nënkryetari i LSI-së Petrit Vasili, i cili herë pas here ka reaguar mbi zhvillime të ndryshme që ka pasur në vend, dhe me akuza ndaj qeverisë. LSI në zgjedhjet e 25 prillit mori 4 mandate, 2 në Tiranë, 1 në Fier dhe 1 në Shkodër. Konkretisht në Tiranë nga radhët e LSI-së marrin mandatin e deputetit Petrit Vasili dhe Erisa Xhixha, në Fier Monika Kryemadhi ndërsa në Shkodër Agron Çela. /Tirana Today
