Përgjimet e SPAK kanë nxjerrë në dritë të tjera të dhëna të forta për çështjen e kryebashkiakut Lushnje, Fatos Tushe dhe vartësve të tij. Një person që i është zbuluar vetëm një inicial nga emri, ka ngritur dyshimet pasi ky personazh ndodhet sot në Parlament. Një personi misterioz ka dalë në përgjimet e SPAK-ut, ku Ibrahim Lami thotë se kishte pirë kafe me “B”.
Dy biznesmenët, Bujar Murati dhe Ibrahim Lami shfaqën të shqetësuar që kompania që humbi tenderin është ankuar të Komisioni i Prokurimeve Publike. Ata flasin në telefon për këtë çështje, teksa përmendin edhe një person të tretë, të identifikuar nga SPAK thjesht me shkronjën “B”. Këtë të fundit, biznesmeni e ka përcjellë në Parlament, që mendohet të jetë deputet.
“Sërish më datë 28.09.2020, ora 12:26, midis të dyshuarve Flamur dhe Ibrahim zhvillohet në një bisedë telefonike nga e cila përftohet e dhëna se Flamuri raporton tek Ibrahimi se “i kanë kthyer përgjigje që të premten atij, se ai të ka të drejtë ta ankimojë tek APP, dhe se nuk e di se ça do bëjë më ai”. Nga ana tjetër Ibrahimi shprehet “se nuk e le me kaq as B…, se dikush tjetër aty lart ka folur.”
Një tjetër bisedë mes Fatos Tushes dhe Ibrahim Lamit tregon se ata kanë njohje me njëri-tjetrin, ku thotë se Ibrahimi “ka pirë një kafe me B., se ai ka thënë që bëjeni mbledhjen me Fatosin dhe më pas Ibrahimi e ka përcjellë në Parlament”, thuhet në dosje.
Kryebashkiaku është shkarkuar për shkelje të rënda. Tushe u arrestua për “shpërdorim detyre” me akuzën e abuzimit me fondet publike. Me urdhër të SPAK-ut, gjithashtu u arrestuan edhe dhjetë punonjës të tjerë të Bashkisë. Një tender me vlerë 24 milionë lekë është shkelja që çoi në operacionin masiv të Prokurorisë së Posaçme.
