Kryetari i Partisë Aleanca për Ardhmërinë e Kosovës, Ramush Haradinaj i ka kërkuar kryeministrit Albin Kurti, që të përgënjeshtrojë deklaratën e zëdhënësit të tij, se marrëveshja e firmosur në Uashington midis Kosovës dhe Serbisë, nuk është legjitime.
Sipas tij, qeveria e Kosovës e drejtuar prej Kurtit, po rrezikon seriozisht partneritetin strategjik me Shtetet e Bashkuara të Amerikës.
”Qeveria Kurti paska deklaruar se e vetmja marrëveshje ndërmjet Kosovës dhe Serbisë, që është nënshkruar në Shtëpinë e Bardhë, qenka juridikisht e pavlerë!
Nëse Kryeministri, nuk e përgënjeshtron këtë deklaratë të zëdhënësit të tij, ai merr gjithë përgjegjësinë e rrezikimit të partneritetit strategjik me Amerikën që është jetik për Kosovën. Këtë nuk do të mund ta bëjë askush, asnjë qeveri e asnjë kryeministër! RH”, shkruan Haradinaj në rrjetin social, Facebook.
Çfarë deklaroi zëdhënësi i Kurtit ditën e djeshme
Zëdhënësi i Qeverisë së Kosovës, Perparim Kryeziu deklaroi se marrëveshja e firmosur në Uashington midis Kosovës dhe Serbisë nuk ka legjitimitet, pasi dokumenti nuk është dërguar asnjëherë në Kuvend.
Në një intervistë për Ekonomia Online, Kryeziu u shpreh se marrëveshja midis dy vendeve është nënshkruar nga Qeveria Hoti, që sipas tij ishte jo legjitime.
Ndër të tjera, ai tha se janë në kontakt me SHBA-në për të punuar së bashku për temat të cilat kanë interes të përbashkët.
“Për ta përsëritur një qëndrim të kamotshëm të kryeministrit Kurti më duhet të them se së pari ai dokument nuk e ka vlerën dhe natyrën juridike të një marrëveshjeje për shkak se asnjë nuk është sjellë në Kuvend as për t’u diskutuar as për ta marrë mbështetjen e Kuvendit dhe si i tillë me të drejtë është quajtur si dokument me zotime të njëanshme të një Qeverie e cila në kohën e nënshkrimit të këtij dokumenti ishte pa legjitimitet dhe më pastaj në ndërkohë u pat vërtetuar se nuk gëzon ligjshmërinë e nevojshme për të qenë në Qeveri. Përtej asaj ne jemi në kontakt me ShBA-në për të punuar së bashku për temat të cilat kanë interes të përbashkët” ,tha Kryeziu.
