Një sulm me tritol ka ndodhur në biznesin e deputetit Lefter Koka. Ngjarja ka ndodhur dy ditë më parë, ndërsa sot janë mësuar detajet. Një dron i mbushur me tritol, ka shpërthyer në kantinën “Gjergj Kastriot Skënderbeu”. Shpërthimi i tritolit ka ndodhur në tarracën e biznesit të Kokës në Durrës.
Autorët kanë përdorur një dron të mbushur me eksplozivë, i cili ka shpërthyer duke u lëshuar nga droni, por fatmirësisht nuk ka persona të lënduar, por vetëm dëme materiale.
Policia e Shtetit ka arrestuar një të dyshuar, Gentian. M., ndaj të cilit Gjykata e Durrësit këtë të premte ka vendosur masën e sigurisë të “arrestit me burg”.
Sipas policisë, shkak i kësaj ngjarje dyshohet se është konflikti tregtar për markën e verës, ndërsa i dyshuari tashmë ndodhet në pranga.
Në komunikatën zyrtare të policisë thuhet se Gentian. M., 44-vjeç, ka vendosur tritol në biznesin ku administrator është Jurgen Dashi. Kjo kompani është krijuar në vitin 1995 me markën kantina e pijeve “Gjergj Kastriot Skëndërbeu”, ndërsa ish ministri Koka, gëzon 88.19 % të aksioneve në këtë shoqëri.
Në pranga ka rënë edhe një person tjetër i dyshuar me inicialet A.M., por ndaj tij gjykata ka caktuar masën “detyrim paraqitje”, pasi akuzohet për shkelje të të drejtave të pronësisë industriale dhe veprime në kundërshtim të gjykatës.
