Kuvendi i Shqipërisë vendosi të shkarkojë nga detyra me 104 vota pro, Presidentin e Republikës, Ilir Meta. Tashmë, fatin e Kreut të Shtetit do ta ketë Gjykata Kushtetuese, e cila do të japë vendimin final.
Por, cili do të jetë ky vendim? E ftuar në emisionin ”Open” në Top Channel, konstitucionalistja Aurela Anastasi, deklaroi se për Gjykatën Kushtetuese, kjo është një sfidë e madhe.
Teksa renditi argumenet që janë përdorur në raportin e Komisionit Hetimor, Anastasi u shpreh se dalluar aktiviteti politik nga ai partiak, pasi presidenca është institucion politik.
Aurela Anastasi: “Unë dua të them që mos prisni një përgjigje përfundimtare nga unë , në këtë rast ne s’kemi dëgjuara palën kundërshtare se Meta nuk u paraqit dhe nuk bëri as ndonjë raport me shkrim për pretendimet e ngritura nga komisioni, ai e kishte këtë të drejtë por nuk e shfrytëzoi. Momenti më i rëndë nga ato që ka parashtruar raporti, është që ka shkel nenin kushtetues, që e përcakton atë si përfaqësues i popullit , simbol i unitetit, kjo është akuza më e rëndë, që i bëhet.
Çështja e kryetarit të shtetit dhe ajo e unitetit të popullit janë koncepte kushtetuese dhe duhet të analizohen, jo vetëm nenet e kushtetutës. Kurse për një konstitucionalist s’ka nevojë për shumë nene. Rendisim këtu: Aktivizimi në politikë, daljen si institucion aktiv në zgjedhje, thyerje e heshtjes zgjedhore. Tani duhet dalluar aktiviteti politik nga ai partiak, dua të them që presidenca është institucion politik.
Sa për thirrjet me sfurqe është një çështje që meriton një diskutim të thelluar, tani ka disa që këto i konsiderojnë si shkelje, ndërsa të tjerë thonë se janë në marzhin e lirisë së shprehjes, ndërsa një deputet tha se kjo është shkelje etike. Pra kemi tre alternativa. Kushtetuesja ka sfida të mëdha.”
Kuvendi shkarkon Metën
Me 104 vota pro, 7 kundër dhe 3 abstenim, Kuvendi vendosi që Kreu i Shtetit duhet të lerë postin e tij, teksa fati i tij tashmë është në dorë të Gjykatës Kushtetuese.
Sipas Komisionit hetimor, Meta ka kryer 9 shkelje, duke nisur që nga betimi i tij si president, te cënimi i procesit zgjedhor, i marrëdhënieve me partnerët strategjikë të Shqipërisë, imazhit dhe reputacionit të vendit, cënimi i figurës së vetë institucionit të Presidentit apo dhe abuzim me kompetencat kushtetuese të Presidentit.
Kjo është nisma e dytë përmes një komisioni të dytë hetimor që ngrihet për hetimet e shkeljeve kushtetuese për Metën brenda 2 viteve, ku mazhoranca kërkonte shkarkimin e tij nga detyra.
