Trafikantët shqiptarë nuk kanë të ndalur me transportimin e lëndëve narkotike. Një sasi e konsiderueshme lënde narkotike me vlerë 200 mijë euro është sekuestruar dje në Maqedoninë e Veriut, ndërsa posedohej nga tre trafikantët shqiptarë.
Lajmin e ka përcjellë Ministria e Punëve të Brendshme në Maqedoninë e Veriut, ku njofton se kanë parandaluar një rast të transportit ndërkombëtar të drogës. Gjatë aksionit në fjalë, janë sekuestruar në cilësinë e provës materiale 65 kg drogë marijuanë. Kjo sasi droge, në treg kap vlerën e 200 mijë eurove. Në pranga kanë rënë shtetasit K.K. (25), M.F. (28) dhe F.B.(42), të gjithë shtetas të Republikës së Shqipërisë. Të njëjtat burime zyrtare shtojnë se droga ka pasur për destinacion përfundimtar Greqinë. Autoritetet njoftojnë se në dy mjete gjendeshin thasët me marijuanë, të paketuara në 44 pako.
“Gjegjësisht, dje në mëngjes, në rrugën rajonale nga Trpejca në Stenje, përmes Parkut Kombëtar Galiçica u ndaluan dy automjete udhëtarësh, tipi “Mercedes”, me targa shqiptare, të cilat morën pjesë në transportin e drogës. Gjatë kontrollit të automjeteve, njëra prej të cilave drejtohej nga K.K., ku si bashkë-drejtues ishte M.F., dhe në makinën e dyta që po drejtohej nga F.B., u gjetën dhe konfiskuan 3 thasë të mëdhenj me marijuanë, të paketuara në 44 pako”, njoftojnë nga MPB.
