Në Itali ka nisur sot herët në mëngjes vaksinimi, e ky shënon një moment historik. Italia është ndër vendet ku ka patur rekorde rastesh me infektime, e po kështu një bilanc tragjik sa i takon pacientëve që kanë ndërruar jetë.
Një dritë në fund të tunelit për Italinë, e cila sot ngjall shpresat për ndryshim në lidhje me pandeminë vdekjeprurëse. Infermierja Claudia Alivernini është bërë punonjësja e parë e spitalit Spallanzani në Romë, e cila ka marrë vaksinën e COVID-19.
Sipas mediave italiane, vaksinimi ka nisur në orën 07:20 të mëngjesit në Institutin Kombëtar të Sëmundjeve Infektive Spallanzani në Romë. Pas tyre janë vaksinuar dhe dy mjeke Alessandra Vergori dhe Alessandra D’Abramo.
“Ndihem mirë, jam e ngazëllyer, jam krenare. Shpresoj që ky privilegj së shpejti do të shtrihet për të gjithë”, ka thënë Maria Rosaria Capobianchi, drejtoreshë e laboratorit të virologjisë Inmi Spallanzani.
Të parët që do të vakinohen janë punonjësit e shëndetësisë dhe të moshuarit, të cilët rrezikojnë më shumë nga virusi.
