Pak orë më parë qarkulloi një lajm se këngëtari Bujar Qamili ishte infektuar me koronavirus, dhe për shkak të gjendjes së rënduar shëndetësore ai ishte transportuar për në Spitalin Infektiv. Madje këto burime shkonin edhe më tej me dashakeqësi, ku thonin se mjeshtri i madh i këngës popullore, Bujar Qamili është transportuar në Itali, për të marrë mjekim më të specializuar.
Por në fakt, të gjitha kanë qenë lajme aspak të vërteta pasi Bujar Qamili nuk është infektuar. Miku i tij Ramazan Çeka zbuloi se këngëtari ka pasur një problem me veshkat gjatë qëndrimit në Itali, por tani është shumë mirë.
“Abcnews.al” ka kontaktuar me një nga miqtë e tij, Ramazan Çeka, i njohur për tekstet e disa këngëve. Çeka u shpreh se Bujar Qamili rreth një muaj më parë iku në Itali, për të rinovuar dokumentet dhe gjatë qëndrimit atje ka pasur një krizë në veshka. Por pas kurimit ndodhet në gjendje shumë të mirë.
“Lajmet e përhapura në media nuk janë të vërteta, mashtrime. Nuk është e vërtetë që Bujar Qamili është në gjendje të rëndë nga covidi. Unë përpara 5 minutash fola në telefon dhe ishte shumë mirë. Është si kokrra e mollës.
Ka pasur një problem me veshkat gjatë qëndrimit në Itali, por tani është shumë mirë”, tha Çeka, i irrituar nga lajmet që po qarkullojnë.
