U bë një kohë e gjatë që shifrat me të infektuarit janë tejet të larta. Pavarësisht asistencës nga ana e mjekëve, mbi 1 mijë persona kanë ndërruar jetë deri më tani, pas infektimit me koronavirus.
Spitalet janë të tejmbushura, e ndërsa është paralajmëruar se përpara kemi një dimër mjaft të vështirë. Më herët është njoftuar se pas ezaurimit të ambienteve spitalore në Tiranë, do të nisë edhe me rrethet.
Sot është hapur spitali i parë rajonal për koronavirusin në vendin tonë. Ministrja e Shëndetësisë, Ogerta Manastirliu, thekson se është hapur Covid-5, që do të jetë Spitali Rajonal i Elbasanit, i cili ka 81 shtretër për të infektuarit me virusin e rrezikshëm.
“Pamë të gjithë pavionet anti-Covid. Janë 3 pavione, që do të shërbejnë për trajtimin e qytetarëve të infektuar. Janë të gjitha shërbimet për të trajtuar qytetarët e infektuar.
Janë 81 shtretër, që kanë infrastrukturën dhe pajisjet e nevojshme, në funksion të të gjitha standardeve. Në skenarin tonë janë 5 spitale rajonale, që do të shërbejnë si spitale Covid, dhe që në total kanë 600 shtretër”, tha ministrja Manastirliu.
