Pas dorëheqjes së ministrit Sandër Lleshaj, kryeministri Rama po mban një takim me kreun e Kuvendit, Gramoz Ruçi në Kryesinë e Kuvendit.
Lleshaj dha dorëheqjen pas vrasjes së të riut Klodian Rasha, nga një efektiv i Policisë së Shtetit. Ai u shpreh se ministria e ka cilësuar si të paligjshëm aktin e policit që vrau të riun, ndërsa theksoi se ata që sot akuzojnë, nuk duhet të harrojnë 21 Janarin.
Pak çaste më parë, efektivi i “Shqiponjave”, Nevaldo Hajdaraj, shfaqi pendesë në gjykatë, ndërsa është shprehur se “kjo që më ndodhi mua, të mos i ndodhë askujt”. Ai qëlloi për vdekje me armë zjarri dhe i mori jetën 25-vjeçarit, Klodian Rasha. Ashtu siç kërkoi edhe prokuroria, gjykata vendosi masën e sigurisë “arrest me burg”. Gjatë seancës, gjyqtarja tha se efektivi ka kërkuar edhe praninë e familjarëve të viktimës në seancë, në mënyrë që të kërkonte ndjesë publikisht.
