Nga: Astrit Patozi
Bindja Demokratike nuk është as aventurë dhe as trill sezonal i disa personave për të pasur pushtet, por një projekt ambicioz, që ka për synim ndryshimin e politik-bërjes në Shqipëri.
Ajo nuk lindi papritur një ditë të bukur para një palë zgjedhjesh, dhe as nuk ka si objektiv arritjen e një rezultati të përkohshëm, por është krijuar dhe do të vijojë të ekzistojë në të ardhmen si një alternativë serioze transformuese dhe qeverisëse për shqiptarët e lodhur nga skandalet dhe dështimet e 3 partive kryesore në Shqipëri.
Rrëzimi i kryetarokracisë, si një regjim shtypës dhe autokratik, pas një reforme të thellë kushtetuese, mbetet kauza e saj kryesore, e cila nuk vlen thjesht për zgjedhjet e 25 prillit.
Nëse do të kthehemi pas në kohë, është fare e qartë se Bindja Demokratike ka një histori gati 8 vjeçare, që lindi në fillim si reagim nga përkeqësimi i demokracisë së brendshme në PD, për t’u kristalizuar më vonë në një forcë e re politike, që synon ndryshimin e sistemit politik në Shqipëri.
Janë të paktën 12 etapa kryesore, përmes së cilave ka kaluar rrugëtimi i gjatë i Bindjes Demokratike, që nga viti 2013 e deri më sot.
