Kreu i qeverisë, Edi Rama, ka komentuar festimin e ditëlindjes së aktorit Bes Kallaku, ku i pranishëm ishte edhe kreu i shtetit Ilir Meta bashkë me bashkëshorten, kryetaren e LSI-së, Monika Kryemadhi. Rama tha se ajo që ka parë ishte një “spektakël i pështirë”.
Kryeministri pohoi se nuk është ai që i vendos masat, por Komiteti Teknik. Duke komentuar rastin e ditëlindjes, ai e konsideroi si një gjest skandaloz nga ana e presidentit dhe kryetares së LSI-së.
“Unë nuk vendos masa, masat i vendos Komiteti Teknik, dhe as nuk monitoroj zbatimin e masave. Por si çdo qytetar kam parë shembullin skandaloz të presidentit, Zonjës së Parë dhe çetës së tyre. Është e qartë besoj për të gjithë që nuk mund të ketë grumbullime, ata na shfaqen në një spektakël të pështirë të karshillëkut jo vetëm me ligjin, por edhe me vetë shëndetin e të tjerëve, në rast se nuk janë të interesuar për shëndetin e tyre. Këtë kam parë. Duhet të shmangim daljet e panevojshme nga shtëpia”, tha Rama.
Pak ditë më parë, Bes Kallaku festoi 35-vjetorin e lindjes dhe kishte mbledhur në festën e tij disa nga personazhet më të njohur. Përveç kolegëve dhe disa këngëtarëve, në festën e tij ishin të pranishëm kreu i shtetit, Ilir Meta, kryetarja e LSI-së, Monika Kryemadhi dhe kryebashkiaku i Kolonjës, Erion Isai.
Presidenti Ilir Meta ishte një nga personazhet e gjobitur nga policia, pasi mori pjesë në ditëlindjen e aktorit Bes Kallaku.
