Kryeministri Edi Rama, ka njoftuar mëngjesin e sotëm se spitali COVID 4 është gati me gjithçka që duhet për vijën e zjarrit. Në një postim në Facebook, Rama thotë se në këtë luftë asgjë nuk do lënë mangët, duke nxjerrë edhe pamjet nga COVID 4.
Statusi
MIRËMËNGJES
Spitali COVID 4 është gati me gjithçka duhet në vijën e zjarrit, por ju lutem kujdesuni për veten e të tjerët, sepse kjo luftë ku ne s’do të lemë asgjë mangut, deri në fund, fitohet vetëm duke bërë secili të vetën.
Dje, Komiteti Teknik i Ekspertëve zhvilloi një konferencë për shtyp nga ku u fol për situatën e pandemisë në vendin tonë. Sipas ekspertëve, situata është përkeqësuar në raport me javët e kaluara, por po mbahet në kontroll. Drejtoresha e ISHP, Albana Fico, bëri me dije shifrat e ndryshuara të ditëve të fundit, duke nënvizuar një përkeqësim të situatës.
Sakaq, zv. ministrja e Shëndetësisë, Mira Rakacolli, ka bërë me dije se nuk ka asnjë arsye që qytetarët të shqetësohen për mungesë të kapaciteteve spitalore, pasi të gjitha janë të llogaritura mjaft mirë.
“Nuk duhet të kemi asnjë shqetësim për pakësim të kapaciteteve spitalore, janë të gjitha të kalkuluara me aq sa mund të kalkulohet. Jemi të kalkuluar që të shfrytëzojmë në maksimum burimet njerëzore dhe spitalore, nuk duhet të kemi frikë që kapacitetet spitalore nuk do të mjaftojnë për të gjithë ata që kanë nevojë për t’u trajtuar me COVID. Asnjë frikë për mungesë të kapaciteteve spitalore”, tha Rakacolli.
