Drejtoria Vendore e Policisë Tiranë, ka gjobitur me 1 mln lekë të reja administratorin e lokalit ku festoi ditëlindjen e 35-të aktori Bes Kallaku, ku ishte i ftuar dhe Presidenti i Republikës, Ilir Meta me kryetaren e LSI-së Monika Kryemadhi, përveç personazheve të tjera të njohur.
Ceremonia e ditëlindjes së aktorit, u zhvillua në shkelje të plotë të rregullave anti-covid për ndalimin e organizimeve festive dhe ndalimin e qarkullimit pas orës 22:00.
”Në lidhje me aktivitetin e zhvilluar më datë 20.11.2020 në një lokal në fshatin Laknas, Bashkia Kamëz, ku shtetasi B.K, kishte organizuar një ceremoni ditëlindje dhe kishte ftuar rreth 30 persona, Drejtoria Vendore e Policisë Tiranë menjëherë mori masa në zbatim të Aktit Normativ, për parandalimin e përhapjes së COVID-19.’’, informon policia.
Në bazë të pamjeve filmike janë identifikuar të gjithë personat që ishin pjesëmarrës në aktivitetin e zhvilluar dhe do ndëshkohen me masë administrative për shkelje të masave kufizuese anticovid-19.
Njëkohësisht, Drejtori i DVP Tiranë ka pezulluar nga detyra 6 punonjës Policie për moskryerje të kontrollit të territorit dhe ndaj tyre Drejtoria e Standarteve Profesionale në Drejtorinë e Përgjithshme të Policisë së Shtetit ka nisur ecurinë disiplinore për shkelje të rëndë.
Policia i bën thirrje administratorëve të lokaleve dhe qytetarëve që të respektojnë me korrektësi masat anticovid duke bërë të mundur shkëputjen e zinxhirit të infektimit nga virusi.
Në bazë të Aktit Normativ, festat dhe grumbullimet me mbi 10 persona janë të ndaluara.
