Situata në Greqi e po kështu edhe në Shqipëri është tejet e rëndë me pandeminë. Por duke parë trendin në rritje të të infektuarve, Greqia ka ndërmarrë hapin e radhës për të frenuar virusin.
Autoritetet greke njoftojnë zyrtarisht se do të shtyjnë deri më 30 nëntor, masat kufizuese me Shqipërinë. Personat që do udhëtojnë drejt Greqisë, do duhet të kenë një rezultat negativ të testit të kryer jo më shumë se 72 orë përpara. Pas kalimit në vendin fqinj, udhëtarët do të duhet të vetë-izolohen për 7 ditë.
“Qeveria greke ka vendosur të shtyjë deri më 30 nëntor masat kufizuese me Shqipërinë, duke marrë shkas nga të dhënat e fundit epidemiologjike. Të gjithë personave që udhëtojnë në Greqi, do t’u kërkohet të kenë rezultat negativ të testit molekular (PCR) për COVID-19, të kryer deri në 72 orë para hyrjes së tyre në vend.
Certifikatat e testit RT-PCR duhet të jenë të shkruara në anglisht dhe të mbajnë emrin dhe pasaportën/numrin e identitetit kombëtar të udhëtarit. Për fëmijët nën 10 vjeç, ky test nuk do të jetë i detyrueshëm. Të gjithë udhëtarët do të duhet të plotësojnë dhe paraqesin formularin e tyre PLF dhe mund t’i nënshtrohen testimit të rastësishëm pas mbërritjes në kufirin grek. Pas kalimit në vendin fqinj, udhëtarët do të duhet të vetë-izolohen për 7 ditë”, thuhet në njoftimin e ambasadës greke.
