Ministrja e Shëndetësisë, Ogerta Manastirliu, në një konferencë për mediat, i ka kthyer një përgjigje akuzave të opozitës se realiteti në spitalet COVID nuk është si i paraqesin. Teksa shprehu falenderimet ndaj punës së mjekëve lidhur me përballimin e pandemisë, Manastirliu tha se masat ishin ndërmarrë, duke ditur se situata do të vështirësohej me ardhjen e sezonit vjeshtë-dimër. Ndër të tjera, ajo pohoi se nëse do të ezaurohen kapacitetet, atëherë skenari i radhës do jetë spitalet rajonalë.
“Nuk ka munguar shërbimi shëndetësor. Shërbimin mjekësor e kanë marrë dhe do të vazhdojnë të marrin nga mjekët që janë në front të luftës me një armik të padukshëm.
Kam një lutje për ju që të bëheni bashkëpunëtorë, që ta përballojmë këtë situatë të pazakontë duke mbështetur armatën e mjekëve dhe infermierëve. E di shumë mirë sakrificën tuaj.
Nuk do të doja që ta nxirrja kurrë, por kujt i shërben shtrembërimi i realitetit, por nuk është ashtu siç e bën opozita. Sot raportohet se në vende si Polonia, Çekia ka mbingarkesë, po a ka konferenca për shtyp që u bëjnë thirrje qytetarëve që të mos besojnë?
Në situata si kjo e pandemisë, rruga e duhur është bashkëpunimi për hir të shëndetit dhe jo shfytëzimi. Ndërkohë që puna jonë nuk ka ndalur në asnjë moment, dhe jemi përgatitur për të përballuar vjeshtë-dimër në pritje të numrit të rritjes së rasteve.
Kemi vijuar rritjen e kapaciteteve dhe kemi gati edhe spitalet rajonale sipas skenarëve. Mjekët e familjes janë të gjithë të angazhuar me udhëzues dhe protokolle të përcaktuara dhe kanë ndjekur mbi 15 mijë pacientë”, tha ministrja.
