Greqia është në izolim, për shkak të rasteve të larta me të infektuar. Sistemi shëndetësor e ka të pamundur për të menaxhuar situatën. Vendi është në gjendje kritike, e ndërsa pasojat po ndjehen edhe në ekonomi për shkak të mbylljes së dytë.
Kjo karantinë, sipas autoriteteve greke, do të jetë fillimisht për tre javë deri në 30 nëntor. Ende nuk dihet nëse do të vazhdojë edhe më tej, e ndërsa specialistët do të japin vendimin nisur edhe nga situata epidemiologjike që do të jetë në vend.
Qeveria e Mitsotakis ka prezantuar edhe masat ekonomike lehtësuese për kategoritë që nuk kanë të ardhura, apo edhe për ata që do të humbasin punën si pasojë e pandemisë. Qeveria greke do të japë 800 euro për ata që humbin punën në këto tre javë izolim.
Gazetari Artur Bibe tregoi në ‘Wake Up’ në Top Channel, si është situata në Greqi në këtë valë të dytë të pandemisë Covid-19. Ai tha se Greqia është në një situatë alarmante, ndërsa për ata që shkelin izolimin, duhet të paguajnë 300 euro gjobë.
“Situata nuk është e mirë, dje kishim rreth 2 mijë të infektuar. Frikshëm po arrin 800 numri i të vdekurve. Ndërsa 69 ndodhen në intubim, gjërat nuk shkojnë mirë, Greqia është vënë në alarm.
Vijon situata me policë, gjoba, kontrolle shumë të rrepta. Është izolim, njerëzit vazhdojnë të shkojnë në punë, pra shkojmë ata që marrin një leje nga Instituti i Sigurimeve që janë në punë.
Jeta vazhdon, por me kufizime. Lokalet, baret, restorantet janë mbyllur. Dyqanet janë mbyllur, por punon vetëm sistemi i shpërndarjes me pica dhe sufllaqe.
Shkollat fillore dhe kopshtet janë të hapura dhe prindërit duhet të marrin leje të posaçme për të dërguar fëmijët në shkollë. Gjoba është 300 euro për ata që shkelin izolimin”, bëri të ditur Bibe.
