Një valë e dytë e koronavirusit, ka bërë që autoritetet në Holandë të rikthejnë kufizimet. Ritja e numrit të të infektuarve, ka bërë që të rikthehen masat e aplikuara pak muaj më parë, kur pati një bllokatë në mbarë botën.
BBC raporton se banorët e Holandës do jenë të detyruar që të mbajnë maskë në ambiente të mbyllura, si dhe në mjetet e transportit publik.
Qeveria ka vendosur që të rikthejë disa kufizime, që mund të zgjasin deri në tre javë. Ministri i Shëndetësisë, Hugo de Jonge, nuk është aspak optimist për situatën.
“Ne po bëjmë më të mirën, por virusi po përhapet”, është shprehur më tej ai. Autoritetet kanë njoftuar qytetarët se duhet të shmangin udhëtimet e panevojshme tek qytetet më të prekura nga virusi. Po ashtu restorantet dhe baret do të mbyllen në orën 22:00, një lëvizje e njëjtë me vendet e tjera evropiane si Mbretëria e Bashkuar, Spanja dhe Franca. Qytetarët do të këshillohen të punojnë nga shtëpia, nuk do të lejohen tubimet si dhe tifozët nuk do shkojnë në stadiume.
