Një 71-vjeçar u ekzekutua dje nga forcat e policisë në qytetin e Elbasanit. Lefter Zhidru u vra nga Forcat Speciale RENEA në Elbasan, pasi ishte ngujuar në shtëpinë e tij dhe qëllonte me breshëri kallashnikovi ndaj policisë.
Nga morgu i spitalit të Elbasanit, bëhet me dije se asnjë nga familjarët e 71-vjeçarit nuk është paraqitur për të marrë trupin e të ndjerit dhe për të kryer ritet mortore.
Vlen të theksohet fakti se në momentin që forcat speciale RENEA po ndërhynin në banesë, ata shpërthyen derën, por u përballën me 71-vjeçarin, i cili i sulmoi përsëri me breshëri plumbash duke rrezikuar jetën e tyre.
Falë mburojës metalike kolektive, nuk është lënduar asnjë punonjës efektiv. Sipas burimeve, forcat RENEA fillimisht kanë goditur derën dhe nga brenda saj ka nisur një breshëri plumbash.
Më pas janë urdhëruar tre snajper në gatishmëri që të qëllonin ndaj të moshuarit nëse arrinin ta shihnin. Në atë moment, një snajper e ka pikasur dhe me një të shtënë në kokë e ka lënë të vdekur.
