Nga Simon Kolstoe “The Conversation”
Studiuesit në Kinë, kanë zbuluar se njerëzit që mbajnë syze, duket se janë më pak të rrezikuar për t’u prekur nga COVID-19. Autorët e studimit, të botuar në “JAMA Ophthalmology”, vunë re se që nga shpërthimi i epideminë së koronavirusit në Vuhan në dhjetor 2019, pak pacientë me syze u shtruan në spital të sëmurë nga Covid-19.
Për të investiguar më tej këtë çështje, ata mblodhën të dhëna mbi mbajtjen e syzeve nga të gjithë pacientët me Covid-19 si pjesë e historisë së tyre mjekësore. Studimi i tyre i vogël, zbuloi se vetëm 16 (5.8 për qind) nga 276 pacientë e shtruar në spital me Covid-19 mbanin syze për më shumë se 8 orë në ditë.
Pasi e verifikuan se që të gjithë këta pacientë ishin dritëshkurtër, ekspertët llogaritën përqindjen e njerëzve me miopi në Provincën Hubei, ku ndodhej spitali. Dhe zbuluan se shifra ishte shumë më e madhe (31.5 për qind), gjë që tregonte se përqindja e të sëmurëve në spital me Covid-19 e miopëve ishte mbi 5 herë më e vogël sesa pritej nga ky segment i popullatës.
Kjo është një gjetje interesante, por si me të gjitha studimet paraprake, rezultatet duhet të trajtohen me kujdes. Ndërsa mbrojtja e syve ka qenë gjithmonë një përbërës i rëndësishëm i pajisjeve mbrojtëse personale, madhësia e diferencës së raportuar nga ky studim ngre dyshime. Kjo s’do do të thotë se rezultatet mund të mos jenë reale, por përkundrazi se nuk duhet të fillojmë të këshillojmë njerëzit për ndryshime të mëdha të sjelljes së tyre (si mbajtja e syzeve krahas maskave të fytyrës).
A janë sytë një “dritare” për virusin?
Një nga hapat kryesorë për çdo infeksion viral, është hyrja fillestare në trupin e njeriut. Ndërsa pjesa më e madhe e trupit tonë është e mbuluar me një lëkurë mbrojtëse, e cila është shumë efektive në parandalimin e hyrjes së viruseve apo baktereve në trupin tonë, “membranat” shumë më të holla mbulojnë rrugët e frymëmarrjes, sistemin e tretjes dhe sytë.
Roli i këtyre membranave më të holla është lejimi i hyrjes së oksigjenit, ushqimit, dhe në rastin e syve, dritës në trupat tanë. Fatkeqësisht, viruset kanë mësuar të përfitojnë nga këto pika hyrëse.
Kjo është arsyeja pse mjekët dhe infermierët përdorin edhe syzet si mjete mbrojtëse. Dhe kjo është logjike po të kemi parasysh që sulmi kryesor ndaj këtyre rajoneve vjen nga grimcat virale të transmetuara përmes ajrit si aerosole.
Që në muajin shkurt ka pasur raportime për njerëz të prekur me Covid-19 për shkak se nuk kishin mbrojtur si duhet sytë gjatë kohës që punonin në spitale. Dihet gjithashtu se receptorët ACE-2, përmes së cilave depërton koronavirusi, janë të pranishme në sytë tanë.
A duhet të nisim që të mbajmë të gjithë syze?
Për të provuar lidhjen në fjalë, duhet një testim. Në mënyrë ideale, duhen rekrutuar dy grupe njerëzish dhe të krahasohen me kujdes – disa me syze dhe disa pa syze – për të parë se cili grup infektohet më shpejt. Provat nga një eksperiment i tillë i kontrolluar, do të jenë gjithnjë e më të forta sesa provat nga një studim vëzhgimor siç është ai në Kinë.
Vetë autorët e këtij studimi renditën një numër dobësish. Ai ishte një studim shumë i vogël dhe në një vend të vetëm. Të dhënat e studiuesve mbi popullatën e përgjithshme, erdhën nga një studim shumë më i hershëm në një mostër që nuk ishte përpunuar si duhet (për sa i përket moshës, demografisë dhe faktorëve të tjerë). Prandaj nevojiten më shumë të dhëna para se të jepet ndonjë këshillë në lidhje me mbajtjen e syzeve krahas maskave të fytyrës si masë mbrojtëse ndaj koronavirusit.
Përshtatur nga TIRANA TODAY
