Ministrja e Shëndetësisë, Ogerta Manastirliu, ka inspektuar spitalin e përshtatur COVID 3 (struktura e ish-kirurgjive në QSUT) ku aktualisht ka filluar rekrutimi i stafit infermieror, i cili po merr eksperiencë në Spitalin Infektiv, për t’u përgatitur për një fluks të shtimit të rasteve.
Manastirliu njofton se sistemi shëndetësor është në përgatitje për zgjerimin e kapaciteteve për përballimin e pacientëve me COVID 19, që kanë nevojë për trajtim spitalor.
“Jemi duke u përgatitur për të pasur burime njërëzore të nevojshme për strukturën e spitalit COVID 3, pra ish-kirurgjitë dhe për spitalin COVID 4 që është në aksin Tiranë-Durrës.
Ka filluar rekrutimi dhe trajnimi i stafit. QSUT-së i janë shtuar 50 punonjës, një pjesë tashmë janë rekturuar dhe një pjesë janë në rekrutim e sipër.
Do të kryejnë dhe trajnimet e nevojshme dhe do të kombinohen me stafe të tjera me eksperiencë”, tha Manastirliu gjatë inspektimit të spitalit COVID 3.
