Kreu i Dhomës së Tregtisë dhe Industrisë, Nikolin Jaka, ia ka dalë mbanë me betejën për koronavirusin vdekjeprurës. Në një konferencë për mediat, Jaka ka thënë se e ka mposhtur virusin, ndërsa ka paralajmëruar të gjithë qytetarët të bëjnë kujdes për të parandaluar infektimin.
“Si njeri që e përjetova dhe kalova këtë virus, të kemi kujdes dhe të respektojmë veten dhe njëri-tjetrin dhe të kemi më shumë besim tek stafi mjekësor të cilët po bëjnë një sakrificë të jashtëzakonshme për ta përballuar me sukses këtë provë”, u shpreh ai.
Nikolin Jaka iu rikthye një çështje shumë të debatuar, që ka të bëjë me rikthimin e izolimit. Ai është i mendimit se nëse do të rikthehen masat shtrënguese, pasojat për ekonominë do të ishin të rënda, pasi shumë biznese do të falimentonin sërish.
“Zbatimi i protokollit ka edhe një kosto dhe kjo është ajo çfarë ne po mendojmë për të trajtuar me qeverinë, për të parë me shume kujdes se kush do i përballoje kostot dhe humbjet që shkakton protokolli. Kështu që një analizë e hollësishme do bëhet pas një periudhe 3 mujore, në mënyrë që të dalin edhe kostot evidente se kush janë”, shtoi ai.
