Policia greke arrestoi dje shtetasin shqiptar, Agim Margegaj, pasi nuk u kthye në burg pas lejes disa ditore për të qëndruar jashtë.
Margegaj rezulton me burgim të përjetshëm në Greqi për vrasje me dashje, tentativë vrasje më shumë se një herë, grabitje në bashkëpunim, armëmbajtje pa leje dhe përdorim arme.
Ndërkohë, ai rezulton edhe në listën e personave më të kërkuar nga Shqipëria. Në listën e publikuar nga policia në vitin 2018, rezultonte edhe emri i Agimit. Ai është dënuar në Lezhë me 35 vite burg për veprën penale vrasje.
43-vjeçari u kap dje me 5.5 kg heroinë nga një operacion policor në Artemida të Athinës. Policia është në kërkim të një fugoni tip Benz, që dyshohet se kishte kaluar nga Kakavija. Pra dyshimet janë që droga të ketë ardhur nga Shqipëria.
