Presidenti Ilir Meta ka komentuar 15 kushtet e vendosura nga Këshilli Evropian, për anëtarësimin e Shqipërisë në BE.
I ftuar në emisionin “Çim Peka LIVE”, Meta tha se ka disa kushte madhore që vendi duhet të përmbushë para se të bëhet konferenca e parë. Ndër to ai përmendi reformën zgjedhore, ngritjen e Gjykatës Kushtetuese, ngritjen e Gjykatës së Lartë etj.
“Situata është e qartë që nga vendimi i Këshillit të vendeve anëtarë, por që u përforcua më shumë nga PE që Shqipëria duhet të plotësojë 15 kushte dhe duhet të plotësojë disa kushte madhore para se të bëhet konferenca e parë, e shpalljes së çeljes së negociatave dhe disa nga këto janë reforma zgjedhore që duhet bërë me konsesus, ngritja e Gjykatës Kushtetuese sipas rekomandimeve të Venecias, ngritja e Gjykatës së Lartë dhe disa kushte të tjera.
Me Ramën jemi takuar në mbledhjen e Këshillit Kombëtar të Integrimit europian dhe e kam bërë të qartë qëndrimin dhe angazhimin tim për plotësimin e kushteve. Pas një vonese të jashtëzakonshme Komisionit të Venecias publikoi raporton final për Gjykatën Kushtetuese dhe unë kam filluar menjëherë punën për zbatimin e tyre. Institucionet e Europës e kanë thënë se do të ndjekin zbatimin e rekomandimeve të Venecias dhe e kanë shprehur se nuk ka vend për komente pasi janë shumë të qarta”, tha ai.
Sipas kreut të shtetit, qeveria mendonte se kushtet mund të zgjidheshin me lobim, teksa thekson se nuk është aspak kështu dhe se janë disa kushte dhe kritere që duhen plotësuar.
“Nëse do të kishte reagim për kërkesat e presidentit në kohën e duhur, si nga kuvendi, si nga KED, si nga ish ambasadorja e BE, Shqipëria do të kishte hapur negociatat dhe nuk do të kishte mbetur pa Gjykatë Kushtetuese dhe pa Gjykatë të Lartë. Presidenti do të bëjë përpjekjet maksimale, jo për muhabet, në mënyrë që të çelen negociatat me BE pasi kjo është kërkesë e shumicës së shqiptarëve”, shtoi ai.
