Prokuroria e Hagës ka ngritur një sërë akuzash për presidentin e Kosovës, Hashim Thaçi dhe kryetarin e PDK, Kadri Veselin, duke i akuzuar për krime lufte.
Lidhur me këtë situatë, analisti dhe politologu nga Kosova, Ramush Tahiri, tha se dialogu Kosovë-Serbi është ndërprerë, dhe nuk mund të ripërsëritet të paktën për një vit.
Në një intervistë për “Abc News”, Tahiri u shpreh se ky është një shans i humbur. “Dialogu ndërmjet Kosovës dhe Serbisë është ndërprerë. Ky dialog nuk mund të ripërtërihet së paku për një vit. Është një shans i humbur dhe është një befasi për të gjithë, sepse në këtë moment nuk kishte nevojë të publikoje akt-akuza”, deklaroi ai.
Më tej, analisti shtoi se tashmë është fakt që Hashim Thaçi nuk do të jetë më faktor në këto bisedime. Siç thotë ai, kjo është goditje për iniciativën amerikane, por edhe për atë franceze.
“Bisedimet janë ndërprerë, dhe është fakt që presidenti Hashim Thaçi nuk do të jetë faktor. Është goditje për iniciativën amerikane, por edhe për atë franceze. Kosovarët nuk do të mund të shkojnë në takimin me Macron”, u shpreh ai.
Më herët, shefi i kabinetit të presidentit të Kosovës, Hashim Thaçi, dhe këshilltari i tij kryesor, Bekim Çollaku, tha se historia e Kosovës nuk mund të ndryshohet nga “lapsi i një gjykate ndërkombëtare, të motivuar politikisht”.
Ai i bëri këto komente në Twitter, pasi Zyra e Prokurorit të Specializuar, me seli në Hagë, e njoftoi publikun se më 24 prill ka paraqitur në Dhomat e Specializuara një aktakuzë për shqyrtim, e cila e ngarkon presidentin e Kosovës, Thaçi, ish-kryetarin e Kuvendit, Kadri Veseli, dhe të tjerë me krime kundër njerëzimit dhe krime lufte.
