Për të përballuar fluksin në rritje të të prekurve me koronavirus, po mendohet të hapet spitali i dytë COVID. Në deklaratën e radhës për mediat, Ministrja e Shëndetësisë ka lajmëruar hapjen e spitalit të dytë COVID, (spitali i ish-Kirurgjive).
“Me plotësimin e kapaciteteve të Spitalit Infektiv, po përgatitemi për hapjen e ish-Kirurgjive në QSUT për të përballuar fluksin aktual dhe po përfundojmë rekrutimin e stafit mjekësor dhe infermieror që do të shërbejë në këtë spital”, tha Manastirliu.
Duke qendruar në të njëjtën linjë, ajo tha se nëse do të kemi shtim të rasteve në terapi intensive, do të hapin spitalin COVID2. Nëse shifrat kapërcejnë këto kapacitete, do të hapet spitali COVID4 në aksin Tiranë-Durrës, i cili do të administrohet nga QSUT.
“Paralelisht me hapjen e ish-Kirurgjive në QSUT, nëse do të kemi shtim të rasteve në terapi intensive, do të hapim spitalin COVID2, pra spitalin ‘Shefqet Ndroqi’. Dhe në skenarin tjetër, nëse shifrat kapërcejnë këto kapacitete, do të hapet spitali COVID4 në aksin Tiranë-Durrës, i cili do të administrohet nga QSUT”.
