Kryeministri Edi Rama aktualisht është duke zhvilluar një takim online me Këshillin Koordinues të Diasporës për të diskutuar “Votën e Diasporës në Reformën Zgjedhore”.
Pjesë nga reagimi i Ramës për çështjen e shumëpërfolur: “Ky është prezantim shumë i përmbledhur dhe i shkurtër lidhur me kuadrin aktual, por ajo që duhet sqaruar paraprakisht është së pari që ne jemi në një proces për Reformën Zgjedhore i pandodhur më parë.
Sot nuk jemi dy palë, por jemi 3 palë dhe skena e palëve politike është 3 polare.
Shumica parlamentare nga një anë dhe një opozitë jashtë parlamentare, por edhe një opozitë brenda parlamentit.
Reforma Zgjedhore kërkon një shumicë të cilësuar që ne nuk e disponojmë aktualisht në Kuvendin e Shqipërisë. Ne duam që të kemi një proces gjithëpërfshirës dhe kjo nënkupton mirëkuptim mes 3 palësh.
Pavarësisht se janë produke të njëjtës barkë apo burim, janë sot në një divergjencë ekstreme. Na duhet një mirëkuptim dhe një tolerancë nga të gjithë palët.
Nuk është se kemi një dakordësi në momentin që flasim pasi djalli është gjithmonë në detaje dhe sigurisht nuk kemi ndonjë parti që të thotë se nuk duan votën e emigrantëve, por sigurisht që kjo nuk është vetëm kaq e thjeshtë.
Duke qenë se ju e dini më mirë se unë se e ndiqni nga larg, procesi ka qenë goxha i ngatërruar dhe konfliktual dhe natyrisht ulja në tryezë është bërë me vonesë dhe në kushte specifike dhe kjo vetvetiu… optimizmi për mundësinë e kësaj vote është i vogël.
Sigurisht për arsye historie politike të konfliktit politik ne e kemi përjashtuar votimin nëpër ambasada. Është më i vështirë nga pikëpamja e lëvizshmërisë.
Për këdo që do të votojë në një ambasadë me një distancë jo të vogël ne kemi lënë si alternativë votimin me postë, por edhe kjo ka problematika të veta. Sigurisht që ky është proces që kërkon goxha kohë, ne kemi ecur nga pikëpamje e ligjit, nuk kemi ecur nga pikëpamja e infrastrukturës.
Ne vetë e kemi objektiv dhe siç thashë angazhim politik dhe jemi duke punuar çdo ditë për këtë”.
