Organizata Botërore e Shëndetësisë shprehet se kanë filluar të shfaqen shenja shprese në luftën kundër pandemisë.
Shefi i OBSH, Tedros Adhanom Ghebreyesus, i bën thirrje shteteve të mos e ulin vigjilencën dhe të vijojnë me zbatimin e masave për frenimin e pandemisë.
“Janë shënuar më shumë se 435 mijë vdekje në dy Amerikat, Afrikë dhe Azinë Jugore, rastet po rriten me shpejtësi. E megjithatë ka shenja shprese. Ne po tregojmë se të bashkuar, me solidaritet global njerëzimi mund ta tejkalojë pandeminë”, tha ai.
OBSH sqaroi se ‘dexamethasone’, anti-inflamatori që ka rezultuar i efektshëm në trajtimin e pacientëve të sëmurë rëndë, duhet të përdoret vetëm nën mbikëqyrjen e mjekëve.
Sipas një studimi, ilaçi i lirë i përdorur që në vitet 60-të, ka reduktuar ndjeshëm vdekshmërinë te personat e shtruar në spital. Edhe për OKB këto të dhëna janë premtuese.
“Është shume e rëndësishme që ilaçi të përdoret vetëm për pacientët në gjendje të rëndë. Duhet të festojmë për këtë zbulim të rëndësishëm, e megjithatë nevojiten studime të tjera”, tha Mike Ryan.
