Kryeministri Edi Rama ka folur lidhje me procesin e rindërtimit dhe vonesës që erdhi si pasojë e kufizimeve të vendosura për frenimin e përhapjes së pandemisë.
Në një konferencë për mediat, Rama shprehu falenderimin e tij ndaj fondacioneve që kanë pritur qeverinë për të bërë një punë të koordinuar.
Kreu i qeverisë e mori vetë përsipër fajin për mosfillimin e punës së këtyre fondacioneve, duke u shprehur se ata kanë duruar gjatë për fillimin e këtij procesi.
“Fondacionet meritojnë falënderimin më të madh dhe mirënjohjen time më të madhe për faktin që kanë pranuar edhe të gëlltisin mosfillimin e punës, vetëm e vetëm që të bëjmë një punë të përbashkët dhe të koordinuar. Kjo do të thotë që nga identifikimi i problemeve, këtu nuk e kam fjalën vetëm për identifikimin e personave që kanë nevojë për t’u adresuar për strehim, por identifikimin e problemeve në zonat ku do të ndërtohet. Që do të thotë që nga pronësia, gjeologjia, gjeografia e deri te kryerja e planeve dhe detajimi i tyre. Çfarë do të thotë kjo? Do të thotë që ne për të finalizuar kontratat për shtëpitë individuale, duhet të kemi pozicionimin e çdo shtëpie individuale në një terren të thyer, që do të thotë që është një punë milingonash sepse vetëm kështu mund të dalësh pastaj në garë dhe pastaj t’i kërkosh atij që fiton garën ekzaktësisht atë që të duhet.
Fillimi i punës u vonua shumë për shkak të pandemisë dhe u ndaluan të gjitha procedurat e garave. Brenda muajit do të kemi finalizimin e kontratave edhe për shtëpitë individuale dhe puna do të fillojë dhe fondacionet do të fillojnë të financojnë pastaj pjesët e tyre por duke bërë një investim të përbashkët. Këto do jenë projekte që do të ndryshojnë cilësisht jo vetëm jetën e banorëve por edhe mënyrën e të organizuarit në komunitet dhe mënyrën e të ndërtuarit një komunitet.
Kështu që unë i falënderoj shumë ata dhe realisht kanë duruar gjatë, kanë duruar shumë, herë pas here më shkruajnë dhe unë iu përgjigjem me ‘aman aman…aman aman’ edhe pak durim. Pra faji është i imi dhe kush i shan ata më ka sharë edhe mua”, tha ai.
