Sikundër kryeministri Rama, në të njëjtën linjë qëndroi edhe Erion Braçe, për mos prekjen e pagave e pensioneve, ndonëse po jetojmë në kohë pandemie. Zëvendëskryeministri Erion Braçe, në një lidhje skype për “Report Tv”, komentoi propozimin e Ilir Beqajt për reduktimin e pagave dhe pensioneve. Ai tha qartazi se qeveria nuk ka asnjë plan për reduktim të pagave e pensioneve.
“Qeveria e ka thënë qartë që nuk ka asnjë plan që të preket asnjë rrogë dhe asnjë pension, qoftë dhe ato suplementare. Beqaj ashtu si çdo qytetar i këtij vendi, është i lirë të gjykojë, të mendojë, të analizojë dhe të jap mendim e të mbajë qëndrimin.
Unë jam kundër, por Beqaj është pro, dhe kjo është normale në një vend demokratik. Nuk ka pse vazhdon qeveria, kur qeveria është shprehur qartë se nuk do të prek asnjë rrogë dhe asnjë pension.
Nuk thash është normal propozimi, por është normale që zoti Beqaj të propozojë dhe gjykojë. Ajo që propozon Beqaj është zgjidhje buxhetore dhe qeveria ia ka dalë pikërisht me këtë buxhet që ka pasur, duke ndërmarrë disa masa.
Instrumenti i parë ka qenë rritja e defiçitit buxhetor për të përballuar paketën e parë të ndihmës, që i është dhënë qytetarëve. Janë prekur një listë e gjatë e shpenzimeve publike, duke u reduktuar nga koncesion dhe shkurtime të tjera të parave publike dhe është përballuar paketa e dytë financiare.
Nëse do të ketë nevojë për një tjetër ndihmë në të ardhmen, përsëri ka një rezervë në shpenzimet operative të buxhetit të shtetit. Ku do të vendoset dhe merren vendimet të përgjegjshme për pagesat e personave në nevojë të biznesit të vogël”, tha Braçe.
