“Qeveria po i shtyn drejt mbylljes”, Basha takohet me përfaqësuesit e fasonëve

Kryedemokrati Basha, ka pritur sot në zyrë përfaqësuesit e biznesit fason. Gjatë takimit, ai është njohur me kërkesat dhe vështirësitë e punës së tyre, në kushtet e pandemisë së koronavirusit.

Në një postim në Facebook, kreu i PD-së njofton se sot ka biseduar me përfaqësuesit e Unionit të Fasonistëve të Shqipërisë, lidhur me shqetësimet për krizën.

Basha shprehet mjaft i shqetësuar se fasonët po përballen me probleme të shumta. Nga rënia e prodhimit dhe e shitjeve, tek mungesa e likuiditetit për të paguar detyrimet ndaj shtetit dhe pagat e punonjësve.

Statusi

Sot bisedova me përfaqësuesit e Unionit të Fasonistëve të Shqipërisë, z.Gjergji Gjika dhe z. Florian Zekja mbi shqetësimet e tyre të mëdha për krizën.

Fasonët po përballen me probleme, nga rënia e prodhimit dhe e shitjeve tek mungesa e likuiditetit për të paguar detyrimet ndaj shtetit dhe pagat e punonjësve. Në vend të mbështetjes për të mbrojtur vendet e punës, qeveria ka shtuar kostot e tyre, duke rrezikuar mbijetesën e qindra ndërmarrjeve.

Me “protokollin e kuq” krejtësisht të pazbatueshëm, qeveria po i shtyn fasonët drejt mbylljes, pa patur detyrimin për ti mbështetur financiarisht punonjësit e tyre. Nëse fasonët falimentojnë, 70 mijë punonjës humbin vendin e punës. Kjo duhet parandaluar urgjentisht.

Është koha që fondet që shpërdorohen në mënyrë korruptive, të shkojnë në mbështetje dhe mbrojtje të punonjësve dhe të bizneseve duke rritur ndihmën ndaj tyre.

Ndërkohë që qeveria vazhdon edhe gjatë këtyre ditëve të paguajë miliona për koncesionet, rritja e papunësisë po kthehet në një plagë edhe më të rëndë, dhe varfëria po thellohet frikshëm.

Paratë e taksave të shqiptarëve sot duhet të shkojnë të gjitha në ndihmë të njerëzve dhe të ekonomisë. Njerëzit meritojnë mbështetjen e munguar ekonomike, biznesi sot ka nevojë për mbështetje, ekonomia ka nevojë për frymëmarrje dhe likuiditet, ndërsa qeveria e ka për DETYRË t’ju garantojë atyre ndihmën financiare që ju takon.

Lexo edhe :   Basha me shoqatën e fasonëve: Jo më fasoneri, por manufaktura shqiptare