Ministrja e Shëndetësisë, Ogerta Manastirliu, ka zbuluar planin me 4 faza, për rihapjen e vendit lidhur me situatën nga koronavirusi. Ogerta Manastirliu foli për “Repolitix” për 4 faza hapje, që do të lejojnë monitorimin e kurbës dhe marrjen e vendimeve në lidhje me hapjen graduale. Manastirliu tha se kjo hapje do të jetë shumë e kujdesshme dhe një fazë shoqërohet me një periudhë dy javore monitorimi, për të parë se si po shkojnë masat e ndërmarra. Ajo sqaroi më tej se e tillë është edhe hapja që ndodhi këtë javë, me hapjen e disa bizneseve apo krijimin e zonave të gjelbra. Po kështu ministrja paralajmëroi se nëse të gjithë nuk respektojnë rregullat dhe distancimin social, atëhjerë do të përballemi me valë të tjera.
“4 fazat e hapjes janë faza që përcaktojnë linjat e një rihapje të kujdesshëm dhe shumë të ngadaltë, por nuk përcaktojnë datat specifike. Ato përcaktojnë një hark kohor të vlerësimit periodik të masave të marra nga hapja e parë, dhe se çfarë impakti kanë ato në një periudhë 2 javore.
E tillë është edhe hapja që ndodhi këtë javë, me hapjen e disa bizneseve apo krijimin e zonave të gjelbra. Nuk është se po jetojmë pa rregulla, madje dhe në zonat e gjelbra ka rregulla që duhen të respektohen.
Që nga dita e hënë, qytetarët janë treguar të kujdesshëm, asgjë nuk ka kaluar dhe jemi në mes të saj. Duhet të jetojmë çdo ditë me rregullat, që ky virus të mos shpërndahet. Nëse nuk respektojmë masat, do të përballemi me valë të tjera që nuk mund t’i përballojmë dot. Është shumë e rëndësishme të ruajmë distancën sociale dhe higjienën në këtë fazë që ndodhemi, në mënyrë që të kemi një panoramë të qartë dhe të plotë të masave, por dhe kthimit në normalitetin e ri. Vetëm vaksina është ajo që do të garantojë uljen e transmetimit, deri në shuarjen e kësaj epidemie”, tha Manastirliu.
