Ministri i Punës në Gjermani, Hubertus Heil shprehet se po planifikon që ta bëjë ligjore të drejtën e punës nga shtëpia, edhe pas gjendjes së krijuar nga koronavirusi.
Në një prononcim për gazetën gjermane ‘Bild’, Heil tha se synon të paraqesë legjislacionin gjatë muajve të vjeshtës.
Ministri i Punës deklaroi se përqindja e forcës punëtore që punon nga shtëpia është rritur nga 12%, në 25% gjatë kohës së krizës. Ndërkohë sipas AP, llogaritet se rreth 8 milionë njerëz punojnë nga shtëpia në shtetin gjerman.
“Kushdo që dëshiron dhe që ia lejon puna, duhet të jetë në gjendje të punojë nga shtëpia, edhe kur pandemia të ketë mbaruar. Ne po mësojmë gjatë kësaj pandemie se sa shumë punë mund të bëhet nga shtëpia”, tha Heil.
Ministri theksoi se ky projektligj nuk do e bëjë të detyrueshme punën nga shtëpia, por do të bëjë që ajo të jetë si mundësi zgjedhjeje.
“Njerëzit mund të zgjedhin që të punojnë plotësisht nga shtëpia, ose ta bëjnë këtë vetëm për një ose dy ditë në javë”, tha ai.
