Pas betejës së ashpër me koronavirusin dhe shifrave të frikshme të të infektuarve dhe jetëve të humbura, situata në Francë duket se ka nisur të qetësohet.
24 orët e fundit, vendi ka regjistruar 369 vdekje, të cilat e kanë çuar në 22,614 numrin total të tyre.
161,488 persona rezultojnë pozitivë me COVID-19 ndërsa 4,725 prej tyre janë paraqitur në gjendje të rënduar shëndetësore.
Sakaq, kryeministri francez Edouard Philippe ka bërë të ditur se këtë të martë do të paraqesë planin e qeverisë për të lehtësuar masat kufizuese në Asamblenë Kombëtare të Francës.
Masat kufizuese, të cilat nisën më 17 Mars, planifikohet të hiqen në datën 11 Maj.
Kështu, Franca është gati t’i kthehet pak nga pak jetës normale.
