Një studim i bërë së fundmi në Greqi tregon se një në dy hotele mund të falimentojnë në shtetin fqinj, për shkak të situatës së krijuar nga koronavirusi.
Sipas institutit të studimeve të hoteleri-turizmit në Greqi, izolimi që ka ardhur si pasojë e pandemisë ka sjellë anulime masive të prenotimeve.
Kështu rrezikohen më shumë se 45 mijë vende pune, ndërsa mund të ketë një dyfishim të numrit të të pa punëve.
Ndërsa nëse këtij numri i shtohen edhe aktivitetet e tjera të lidhura me sektorin, si zyrat turistike, shoferët e autobusëve, shërbimet e pastrimit ose ato të furnizimit me ushqime, dëmet janë ekstremisht të mëdha, thonë ekspertët e këtij instituti.
Sipas njoftimit të qeverisë, hotelet dhe strukturat e dhomave me qira do të qëndrojnë të mbyllura deri të paktën më 27 prill.
Por mediat fqinje thonë se është pothuajse e sigurt se ku afat do të zgjatet deri në 15 maj. Në këtë periudhë pritet se do të hapet kufiri me vendet fqinjë, dhe do të lejohen fluturimet nga dhe drejt Greqisë.
Ngërçi më i madh për sektorin është kthimi i paradhënieve të marra prej klientëve të cilat në përgjithësi janë investuar në infrastrukturën e hoteleve, ndërsa çdo vonesë në hapje duket se rëndon me miliona euro në ditë këtë sektor.
Sipas llogaritjeve nevojat emergjente për këtë sektor llogariten në 1.75 miliardë euro, shifër e llogaritur deri në datën 27 prill, por nëse kriza do të vazhdojë edhe në maj do të duhen më shumë se 2.2 miliardë.
Llogaritet se dëmi që hoteleria do të pësojë për vitin 2020 të jetë rreth 4.6 miliardë euro. Greqia arkëton nga turizmi rreth 16 miliardë euro në vit, fitime neto.
Deri më tani në shtetin fqinj janë regjistruar mbi 2 mijë raste infektimi me koronavirus, ndërsa 98 persona kanë ndërruar jetë.
