Situata nga koronavirusi duket të jetë stabilizuar në Itali, teksa numri i viktimave po shënon rënie nga dita ditës.
Në 24 orët e fundit në Itali kanë humbur jetën 570 persona, duke e çuar në 18,848 numrin total të viktimave. Ditën e sotme janë shënuar 3,591 raste të reja me COVID-19, teksa numri total i rasteve ka shkuar në 147,577.
Rreth 2 mijë persona janë shëruar në 24 orët e fundit në shtetin fqinj. Gjithsej në Itali janë shëruar mbi 30 mijë persona.
3,497 persona janë shtruar në spital në kujdesin intensiv sot, 108 më pak se dje. Ndërsa 28,242 persona janë shtruar në spital me simptoma, 157 më pak se dje.
Edhe pse shikohet një rënie në numrin e viktimave, prapë kjo shifër mbetet e lartë për një periudhë ditore.
Italia vijon të jetë shteti që ka regjistruar më shumë viktima nga koronavirusi, e ndjekur nga SHBA-të, Spanja, Franca dhe Mbretëria e Bashkuar.
SHBA shënon 478,109 raste infektimi me COVID-19, numri më i madh ky i regjistruar nga ndonjë vend tjetër. Numri i vdekjeve vijon të jetë tepër i lartë në SHBA, pasi prej pothuajse 1 jave, më shumë se 1 mijë persona po vdesin çdo ditë.
Italia shënon tashmë vetëm 870 viktima më shumë se Shtetet e Bashkuara të Amerikës.
