Ditën e sotme është nisur nga Turqia avioni me artikuj mjekësor, i cili ka si destinacion përfundimtar Britaninë e Madhe.
Mësohet se Turqia i ka dërguar Britanisë veshje personale mbrojtëse, maska kirurgjikale, maska industriale N95 dhe veshje mbrojtëse trupore.
Pajisjet ishin paketuar në pako me mbishkrime solidariteti, përfshi dhe fjalët e poetit të shekullit të 13-të Jalaluddin Rumi: “Pas trishtimit ka shpresë dhe pas errësirës del një diell më i shndritshëm”.
Më herët ditën e sotme edhe Gjermania dhuroi 60 ventilues të lëvizshëm për sistemin shëndetësor në Britaninë e Madhe.
Që nga shpërthimi i koronavirusit në Evropë, qeveria turke ka dërguar pajisje të ngjashme edhe në Itali, Spanjë dhe në vendet e Ballkanit.
“Nën udhëheqjen e presidentit Rexhep Tajip Erdogan, avioni i forcave të armatosura turke ka dërguar në Britani pajisje mjekësore të përgatitura nga ministria e shëndetësisë në luftën kundër COVID-19”, tha Ministria turke e Mbrojtjes.
Kujtojmë se Mbretëria e Bashkuar është një nga vendet më të prekura nga koronavirusi në botë. Ajo mban vendin e pestë për numrin më të madh të vdekjeve nga koronavirusi (7,978), pas Italisë, SHBA-ve, Spanjës dhe Francës.
