Kryeministri në detyrë i Kosovës Albin Kurti i ka shkruar letër Përfaqësuesit Special të Bashkimit Evropian për Dialogun dhe Çështje të tjera Rajonale të Ballkanit Perëndimor, Miroslav Lajçak.
Kurti ka bërë të ditur se do të themelojë një ekip negociator që do ta udhëheqë ai, dhe se në të do të marrin pjesë edhe Presidenti i Kosovës Hashim Thaçi dhe kryeparlamentarja Vjosa Osmani.
Përmes letrës, Kurti e ka informuar Lajçakun për situatën lidhur me koronavirusin në vend.
Kurti ndër të tjera ka shkruar se Kosova është e përkushtuar për dialog me Serbinë që ndërmjetësohet nga BE dhe Shtetet e Bashkuara.
“Ne nuk kemi nevojë as për një dialog i cili përfshin hartat në tryezë, e as për një proces që na çon në ridefinimin e kufijve. Kjo është e një rëndësie thelbësore. Dialogu duhet të ndërmjetësohet nga Bashkimi Evropian dhe Shtetet e Bashkuara të Amerikës. Pas kësaj, marrëveshja përfundimtare duhet të shoqërohet me një garanci nga Bashkimi Evropian dhe Shtetet e Bashkuara që obligon zbatimin e ndërsjellë dhe të plotë të marrëveshjes”, thuhet në letrën e Kurtit.
