Kryeministri ende në detyrë i Kosovës, Albin Kurti ka folur në lidhje me votimi e mocionit të mosbesimit që e rrëzoi atë nga pushteti.
Në një intervistë për emisionin “Desku” në KTV, Kurti tha se e vetmja arsye pse është votuar ai mocion është se nuk pranoi të shpallte gjendjen e jashtëzakonshme nga koronavirusi.
Ai tha se presidenti Thaçi nuk është mësuar me kompetencat e tij, por ai do që të bëjë rolin e mbretit në vendin e tij.
“Kemi një president që nuk është mësuar me kompetencat presidenciale, ai do pushtet. Ti nuk mund të bësh mbretin e vendit tënd i cili është Republikë.
I bie që është shumë keq që presidenti t’i drejtohet Kuvendit për gjendjen e jashtëzakonshme, kur nuk është dakord kryeministri. Pra çfarë mund të bëjmë? Heqim kryeministrin. Me 31 deputetë mund ta shpallësh gjendjen e jashtëzakonshme. Ky është një defekt i Kushtetutës sonë.
Në mbledhjen e 17 marsit ku mori pjesë edhe Thaçi u mbrojt dhe u lëvdua puna e policisë së Kosovës. Dhe të thuash pak orë pas mbledhjes se duhet shpallur gjendja, i bie që ta kundërshtosh policinë tënde duke e quajtur të pamjaftueshme”, tha Kurti.
Ndërkohë Kurti u shpreh se në kushte të tjera ky mocion nuk do kalonte aq lehtë. Ai u shpreh se përhapja e koronavirusit në vend bëri që të shmangej “demonstrata më e madhe popullore që ka parë Kosova ndonjëherë”.
Kurti la të nënkuptuar se nëse kjo sjellje e presidentit Thaçi vazhdon, demonstrata do të zhvillohet me patjetër në të ardhmen e afërt.
