Kryeministri Edi Rama ka paralajmëruar se koronavirusi është një luftë e cila do të zgjasë shumë.
Në një intervistë për emisionin “Real Story”, Rama deklaroi se po merren masat për variantin më të keq. Kreu i qeverisë tha se po shtohen kapacitetet spitalore, pasi mund të ndodhë që ato aktualet të ezaurohen.
“Askush nuk e di sa do të zgjasë, por të gjithë marrim masa. Ne jemi të detyruar të marrim masa për variantin më të keq. Kur kapacitetet tona spitalore do të ezaurohen, ne duhet të kemi kapacitete të tjera dhe do t’i kemi me patjetër”, tha Rama.
Rama komentoi edhe deklaratën e Metës, i cili u shpreh mbrëmjen e djeshme se brenda njëkohe të afërt Shqipëria do të ketë mijëra tamponë për teste. Ai theksoi se testet do iu bëhen vetëm personave që shfaqin simptoma të njëjta me ato të koronavirusit.
“Këtë nuk e vendosim unë apo presidenti. Ka pasur shumë qasje. Rasti i Koresë së Jugut nuk është rasti i shumicës. Irlanda ka ndryshuar sot strategji, duke thënë se testi do i bëhet vetëm atij që ka simptoma të rënda. Ne i kemi besuar ekspertëve, që besoj se janë të kalibrit ndërkombëtar. Nuk po shoh çudira as në vendet e tjera. Edhe konsultat që kemi bërë me ekspertë ndërkombëtarë na kanë konfrimuar se strategjia jonë është e duhura për qasjen që ne kemi zgjedhur, duke pasur parasysh se ne jemi vendi që kemi marrë masa shtrënguese shumë shpejt.
Më vjen keq që kam qenë i pari që kam përdorur fjalën ‘luftë’. Kjo është një luftë e panjohur në historinë e njerëzimit. Është një luftë, të cilës njerëzimi nuk ja di ilaçin dhe nuk di si të reagojë, ndaj e vetmja gjë është të mbrohet. Ky armik nuk ndalet, thjesht të pengohet të përparojë me shpejtësi, pasi kjo është fatale, se fut në kolaps sistemin shëndetësor të çdo vendi. Është një luftë për të cilën duhet të përgatitemi se mund të zgjasë dhe do të zgjasë shumë”, deklaroi ai.
