Spanja ka publikuar bilancin e viktimave nga koronavirusi për 24 orët e fundit dhe situata nuk duket fare mirë.
Sipas Worldometer, më shumë se 630 persona kanë ndërruar jetë nga koronavirusi ditën e sotme, duke e çuar në 3,445 numrin total të viktimave.
Spanja ia kalon kështu edhe Kinës duke u renditur si vendi i dytë në botë, pas Italisë, me numrin më të madh të vdekjeve të shkaktuara nga koronavirusi.
Ndërkohë në Kinë janë regjistruar 3,281 viktima, ndërsa numri i vdekjeve nga Covid-19 ka rënë ndjeshëm në këtë vend.
Edhe Italia shënoi një numër të madh viktimash në 24 orët e fundit, duke e çuar numrin total të vdekjeve nga Covid-19 në 7,503.
Më shumë se 460 mijë raste infektimi janë shënuar në gjithë botën nga koronavirusi. Nga këto: kanë ndërruar jetë 20,852 pacientë, ndërsa 113,802 prej tyre janë shëruar.
