Rreth 35 kompani dhe institucione akademike, janë në garë më kohën dhe me njëra-tjetrën, për të prodhuar vaksinën kundër koronavirusit, që deri tani ka infektuar afro çerek milionë njerëz, dhe shkaktuar mbi 10 mijë viktima.
Të paktën 4 prej kompanive, kanë nisur tashmë testimin e prototipeve tek kafshët dhe njerëzit. Të dhënat e para janë shpresëdhënëse. Progresi i madh është arritur edhe falë përpjekjeve të hershme të studiuesve kinezë, që arritën të sekuenconin shpejt materialin gjenetik të Sars-CoV-2.
Ky koronavirus, ka 80-90 për qind të materialit të tij gjenetik me virusin që shkaktoi SARS-in. Ekspertët vlerësojnë se rruga e zhvillimit të vaksinave kundër Covid-19 me shpejtësinë e kërkuar, do të kushtojë rreth 2 miliardë dollarë gjatë 12-18 muajve të ardhshëm.
Deri atëherë, mjekët në shumë vende po përdorin barna mbështetëse alternative. Kështu, së fundmi ka dhënë rezultat ilaçi francez kloroklin, i përdorur kryesisht kundër sëmundjes së malarjes.
Ai po përdoret në masë në Francë, por dhe në Itali. Rezultate të mira ka dhënë edhe një ilaç tjetër që përdoret zakonisht kundër artritit reumatoid. Përveçse do e shpëtojë botën nga emergjenca më e rëndë shëndetësore që nga viti 1918, vaksina për koronavirusin do e nxjerrë botën nga kriza e rëndë ekonomike ku e ka zhytur.
Më të interesuarat për këtë janë 2 ekonomitë më të mëdha në botë, ajo kineze dhe amerikane. Gara mes të dyjave, është edhe për prestigj dhe krenari kombëtare.
Nga ana tjetër, kjo vaksinë do të gjenerojë qindra miliarda dollarë për kompaninë që e shpik e para. Dhe kjo do të ndihmojë direkt ekonominë e vendit të cilit i përket.
TIRANA TODAY
