Sot Kina ka regjistruar rekordin minimal të rasteve të reja të koronavirusit, ndërsa në 24 orët e fundit ka patur vetëm 19 viktima nga 40 që ishin një ditë më parë. Presidenti kinez, teksa ka vizituar sot qytetin e Wuhan, epiqendër e shpërthimit të epidemisë nga koronavirusi, është shprehur se Kina pothuajse e ka fituar betejën me virusin vrastar.
Ekipet amerikane kanë analizuar rastet e njohura në Kinë, dhe në vendet e tjera për të kuptuar më shumë rreth sëmundjes. Duke qenë në të njëjtën linjë, shkencëtarët kanë konfirmuar se duhen mesatarisht 5 ditë, që njerëzit të shfaqin simptomat e koronavirusit.
Kërkuesit kanë dalë në përfundimin se ata persona që nuk shfaqin simptoma deri pas ditës së 12-të, nuk ka gjasa që t’i shfaqin më ato. Ndonëse sërish mund të jenë bartës të infeksionit, raporton BBC.
Kërkuesit këshillojnë ata që mund të jenë infektues-kanë apo jo simptoma- të vetëizolohen për 14 ditë, që të shmangin përhapjen tek të tjerët.
Teksa Kina po shikon përmirësim nga koronavirusi, e njëjta situatë nuk është në Itali. Nga sot, kufizimi i lëvizjes i urdhëruar në 8 mars për Lombardinë dhe 14 provincat e tjera qendrore-veriore, tani është shtrirë në të gjithë territorin kombëtar.
“Nuk ka më një zonë të kuqe – tha kryeministri Conte. “Objektivi ynë kryesor është shëndeti i qytetarëve i cili prevalon mbi interesat e tjera. E ardhmja e Italisë është në duart tona dhe secili duhet të bëj pjesën e tij”.
