Anëtarja e Kryesisë të LSI-së, Silva Caka ka komentuar videon ku pretendohet se shfaqet kryebashkiaku i Bulqizës, Lefter Alla duke konsumuar lëndë narkotike.
E ftuar në rubrikën “Opinion” në News24, Caka u shpreh se që momenti i publikimit të kësaj videoje, Alla duhej të ishte pezulluar. Ajo paralajmëroi se shume shpejt do të dalin në dritë edhe raste të tjera të dënimeve të kryebashkiakëve tjerë.
“Minimalisht Alla duhet të ishte pezulluar. Rasti ishte një praktikë e Rilindjes që është bërë normale tashmë. Ne si opozitë e bashkuar bëjmë punën tonë. Edhe ne si LSI do të bëjmë hetime. Para disa ditësh na ka ardhur një denoncim për një zyrtar në Vlorë. Këta janë njerëz që shfrytëzojnë pushtetin që iu ka dhënë Rilindja për të bërë pastaj abuzime nga më të ndryshmet. Çdo qytetar që ka denoncime duhet të vijë pranë zyrave të LSI e të opozitës. Shumë shpejt do të bëjmë edhe një denoncim. Rama solli një kastë njerëzish të inkriminuar. Me votimet moniste, kriminelët u shtuan. Ju siguroj se rasti i Allës nuk është i fundit. Ne po punojmë dhe do të nxjerrim në dritë fakte për dënime të kryebashkiakëve të tjerë. Shpresoj që Prokuroria të bëjë punën e saj”, tha ajo.
Caka tha se ka dyshimet e saj në lidhje me mirëfunksionimin e SPAK-ut , teksa përmend edhe disa raste që e bëjnë atë të mendojë kështu.
“Unë nuk dua ta paragjykoj SPAK-un. Por kam pasur përshtypjet e mia. U ngrit me vrap e me vrap dhe me 8 prokurorë, kur e dimë fare mirë se nuk duheshin tetë prokurorë. U ngrit për raste të korrupsionit të nivelit të lartë, por do të shohim se do të merret me cështje krejt të tjera. Në SPAK kishim persona që kanë shërbyer edhe para viteve 1990, gjë që nuk duhej të ndodhte. Tjetër është takimi i kreut të SPAK me Ulsi Manjës. Si mund të zgjidhet cështja e Dibrës, kur Ulsi Manja takon prokurorët. Janë këto çudira që bën që edhe qytetarët të humbin besimin”, tha Caka.
