Një betejë e ‘vdekur’ rezultoi kjo e opozitës për marrëveshjen e Reformës Zgjedhore, nëse i referohemi deklaratave të disa kohëve më përpara nga kryedemokrati Lulzim Basha dhe drejtuesja e LSI-së Monika Kryemadhi.
Një ditë më parë, opozita jashtëparlamentare arriti në një marrëveshje me mazhorancën duke vulosur një herë e mirë Reformën Zgjedhore. Sipas palëve, kjo marrëveshje erdhi si pasojë e kushteve të vendosura nga Bundestagu gjerman për hapjen e negociatave të Shqipërisë me Brukselin.
A u flijua opozita për integrimin?
Partia Demokratike dhe Lëvizja Socialiste për Integrim në deklaratat e tyre pas marrëveshjes thanë se integrimi i Shqipërisë në BE është një detyrë që i kalon kërkesat dhe përplasjet politike të vendit. Sipas tyre, është koha që të ulin armët dhe klanet politike të bashkohet për përmbushjen e reformave që kërkohet me domosdo nga ndërkombëtarët.
Por çfarë ndodhi me deklaratat e opozitës jashtëparlamentare për zgjedhje pa Edi Ramën dhe për zgjedhje të parakohshme?
Edhe pse nën zë, opozita vijon ti kërkojë këto dy kushte të vendosura prej tyre, por duket se janë djegur.
As zgjedhjet e parakohshme dhe as largimi i Edi Ramës, nuk janë përfshirë në marrëveshjen e firmosur për Reformën Zgjedhore.
Para pak muajsh PD dhe LSI dogjën mandatet duke hedhur poshtë zgjedhjet vendore dhe duke i dhuruar të gjitha bashkitë e vendit të majtës.
Opozita nuk pranoi 30 qershorin, datë që u çdekretua edhe nga Presidenti Ilir Meta.
Opozita doli nga Kuvendi duke djegur mandatet dhe duke çuar Kuvendin e Shqipërisë në një pikë që nuk është parë asnjëherë në këto 29 vite tranzicion.
Në këto kushte, ngrihen shumë pikëpyetje, nëse opozita është shitur duke hequr dorë nga zgjedhjet e parakohshme dhe nga largimi i Edi Ramës.
Një tjetër skenar është presioni i ndërkombëtarëve. Që nga fillimi i betejave politike, instancat më të larta të huaja, kanë dalë në mbrojtje të qeverisë duke kritikuar opozitën që të mos djegë mandatet dhe të pranojë zgjedhjet e 30 qershorit.
Brukseli shpesh herë në deklaratat zyrtare ka kritikuar Bashën dhe Kryemadhin që të pranojnë Reformën Zgjedhore si një nga 9 kushtet për të hapur negociatat.
Nësë opozita nuk do të vepronte siç veproi duke mos djegur mandatet dhe duke pranuar 30 qershorin si datë për zgjedhjet vendore, sot demokratët do të kishin zërin e tyre në Kuvend dhe rezultati i zgjedhjeve do të ishte ndryshe.
Pas marrëveshjes, Oerd Bylykbashi tha se është parashikuar të zhvillohen zgjedhje të parakohshme, ndërkohë që qeveria e mohon këtë gjë.
Ajo që ngelet për tu parë janë pikërisht zgjedhjet e parakohshme. Në këtë stad, është mbyllur më sukses Reforma Zgjedhore, tashmë ngelet testimi i saj. /Tirana Today
