Me pyjet e harlisura dhe qytetet plot gjallëri, tradicionale por dhe teknologjikisht e përparuar, Japonia është një vend ku e kaluara dhe e ardhmja takohen në një harmoni të përkryer. Ja cilat janë arsyet kryesore, që e bëjnë Japoninë shumë të veçantë, krahasuar me vendet e tjera:
Përjeton rreth 1.500 tërmete çdo vit, por është ekonomia e tretë më e fuqishme në botë
Në këtë vend ka rreth 111 vullkane aktive, nga të cilët 15 shpërthejnë çdo vit. Shumica e tyre, përbëjnë një kërcënim serioz për jetën e njerëzve. Japonia ndodhet në të ashtuquajturën “Unaza e Zjarrit”, një zonë ku takohet pllaka kontinentale më atë oqeanike. Për këtë arsye, ka qenë në shënjestër të 10 prej katastrofave më të rënda natyrore të 100 viteve të fundit. Ajo goditet çdo vit nga 1500 tërmete mesatarë dhe të fortë, e megjithatë mbetet ekonomia e tretë më e madhe në botë përsa i përket PBB-së.
Pavarësisht se ka një dendësi të madhe të popullatës, mbi 68.55 për qind e territorit mbulohet nga pyjet
Politika japoneze e administrimit të pyjeve, nisi 4 shekuj më parë kur kërkesa e shtuar për dru, si pasojë e rritjes së popullsisë, kërcënoi seriozisht pyjet e vendit. Një valë e dytë pyllëzimi, nisi pas Luftës së Dytë Botërore. Sot si qeveria, ashtu edhe organizatat joqeveritare, mbjellin vazhdimisht pemë për të kompensuar emetimet e karbonit në atmosferë.
Në shkollat japoneze, pastrimi është pjesë e kurrikulës shkollore
Në shkollat japoneze, fëmijët mësohen që në moshën 6-vjeçare sesi të pastrojnë, si pjesë e veprimtarive të përditshme të shkollës. Kjo mendohet se nxit respektin dhe përgjegjësinë ndaj mjedisit përreth. Natyrisht disa punë të vështira si pastrimi i banjove, pikturimi dhe riparimi i ambjenteve, u lihen pastruesve profesionistë.
Ka një nga sistemet hekurudhore më të përpikta në botë
Linja Shinkansen e trenave të shpejtësisë të lartë midis Tokios dhe Shin-Osaka në vitin 2018, vendosi rekord me më pak se 1 minutë vonesë. Zakonisht, vonesat janë aq të rralla, sa kompania mund të bëjë publike një “ndjesë zyrtare”, nëse treni është 5 minuta me vonesë. Në rast se është një orë me vonesë, atëherë kjo përbën një lajm për mediat.
Ka nivelin më të ulët të njerëzve mbipeshë midis vendeve të zhvilluara
Bazuar në standardet ndërkombëtare të indeksit të masës trupore (BMI), vetëm 4.3 përqind e japonezëve klasifikohen si obesë, krahasuar me 36.2 për qind të amerikanëve. Në vitin 2008, Japonia miratoi të ashtuquajturin “ligji i metabolizmit”, që kërkon nga qytetarët 40-75 vjeç të masin një herë në vit gjerësinë e belit, për të mbajtur nën kontroll përhapjen e sëmundjeve metabolike si diabeti, dhe goditjet në tru apo zemër.
Shumë shkolla dhe kompani organizojnë “seminaret e qarjes”, për të lehtësuar stresin
Studentët në shkolla, apo punonjës të kompani të ndryshme, marrin pjesë në aktivitete të tilla të çuditshme. Ata qajnë për të lehtësuar stresin, dhe për t’u ndjerë rehat, dhe në gjendje të ndajnë me të tjerët emocionet e tyre. Kompanitë punësojnë enkas një njeri, që u tregon punonjësve video të trishta, dhe u fshin lotët e pjesëmarrësve në seminar. Në shkolla merr pjesë një profesionist i njohur si “namida sensei”, ose “mësues i lotëve”, që organizon aktivitete dhe ligjërata rreth të qarit.
Niveli i krimit është në rënie prej 17 vjetësh
Sipas të dhënave zyrtare, nga 2.8 milionë krime të regjistruara në vitin 2002, në vitin 2017 u regjistruan më pak se 1 milionë të tilla. Ndërkohë për çudi, vërehet një rritje e krimeve nga të moshuarit, me japonezët mbi 65-vjeç, që kryejnë krime 4 herë më shumë se më parë.
Jetëgjatësia mesatare në Japoni, është një nga më të lartat në botë, 84.5 vjeç
Çdo njeri që mbërrin 100 vjeç në Japoni, nderohet nga kryeministri i vendit me një dhuratë simbolike, që është një filxhan prej argjendi të pastër, një traditë që ka nisur në vitin 2009. Por nga ajo kohë, ka pasur një rritje kaq të madhe të numrit të 100-vjeçarëve, saqë qeveria duhej të kalonte në vitin 2016 tek filxhanët me argjend të përzier. Që nga viti i kaluar, në vend numërohen gati 70 mijë njerëz të moshës 100-vjeç, ose më të moshuar.
TIRANA TODAY
