Mjeku i Urgjencës në Shkodër Astrit Lahi shprehet se 5-vjeçari që u gjend i aksidentuar në rrugë nga një shofer i rastit ka marrë plagë kryesisht në pjesën e pasme të kokës. Ndërsa theksoi se gjendja e tij shëndetësore paraqitet e rënduar.
Sipas njoftimit të policisë, i mituri udhëtonte në automjetin e babait të tij, shtetasit me inicialet H. K., 50 vjeç, ku në një moment ka hapur xhamin e dritares së makinës dhe ka rënë aksidentalisht prej andej.
“Gjendja e fëmijës është e rëndë, si pasojë e një traume të pësuar. Djali ka ardhur në urgjencë pa koshiencë. Është gjetur nga një qytetar në rrugë, pa një identitet. Ishte paraqitur me një plagë pas koke dhe me probleme në frymëmarrje dhe koshiencë të kompromentuar. Iu dha ndihma e shpejtë.
Gjendja e tij pësoi një farë përmirësimi, por do të shohim se si do të shkojë. Aktualisht gjendja e fëmijës është më prognozë të rezervuar dhe ai është shtruar në reanimacion. Është herët të flasin, pasi paraqet shenjat e një konvolcioni cerebral. Duhet të kalojnë disa orë. E sollën qytetarët që e kishin gjetur në rrugë, të vetëm.
Nuk kishim informacion për identitetin e fëmijës. Më pas është paraqitur i ati, i cili tha se fëmija kishte rënë nga dritarja e makinës. Dëmtimet i ka në pjesën e pasme të kokës. Ka një plagë në pjesën parietale dhe një hematomë në pjesën oksipital, zona të rezervuara. Jemi herët për të folur, shpresojmë për më mirë”, tha mjeku.
