Prindërit e një 16-vjeçareje nga Bulqiza kanë denoncuar pesë herë brenda një viti humbjen e vajzës së tyre.
Burimet zyrtare nga Policia e Dibrës kanë bërë të ditur për gazetën “Panorama” se 16-vjeçarja është kthyer prej kohësh në shqetësim për Policinë e Bulqizës.
Prej një viti, shtetasja me iniciale P.SH. shqetëson dy prindërit, Policinë lokale, si dhe Drejtorinë e Shërbimit Social në Qarkun e Dibrës.
“Ne, janë shprehur prindërit në Polici, e trajtojmë vajzën mjaft mirë, ashtu siç trajtojmë gjashtë fëmijët e tjerë. Por ajo largohet nga shtëpia tinëz, kryesisht natën. Nuk dimë ku vete, me kë rri, çfarë bën, ku ushqehet. Kemi frikë se po e trafikojnë apo e shfrytëzojnë për prostitucion. Disa ditë më parë është ndalur në doganën e Morinit, teksa udhëtonte drejt Kosovës. Nuk na thanë me kë po udhëtonte dhe pse tentoi të largohej nga Dibra”.
Ndërkohë, adoleshentja ka deklaruar në polici se kur largohet nga shtëpia kryesisht qëndron te shoqet: “Unë largohem nga shtëpia sepse prindërit nuk më lejojnë të dal me shoqet e shokët. Nuk mund të rri e mbyllur në shtëpi. Kur largohem zakonisht qëndroj te shoqet e mia në Bulqizë, Peshkopi e Tiranë”.
Dyshohet se e mitura është konsumuese e lëndëve narkotike.
“Panorama” shkruan se një vit më parë, 16-vjeçarja është përjashtuar nga shkolla për shkak të numrit të lartë të mungesave dhe sjelljes jo normale në ambientet arsimore.
Edhe pse janë zhvilluar disa herë mbledhje dhe takime me prindërit, adoleshentja sërish nuk i bindej njeriu.
